" മഹാമാരിക്കെതിരെ പ്രതിരോധം
പനത്തടി ഗ്രാമപഞ്ചയത്ത് "
കോവിഡ് വൈറസ് കേരളത്തിൽ റിപ്പോര്‍ട്ട് ചെയ്ത് ഉടൻ തന്നെ ജില്ലയിലെ മലയോര പഞ്ചയാത്ത് ആയ പനത്തടി ഗ്രാമപഞ്ചായത്തിൽ പ്രതിരോധ നടപടികൾ ആരംഭിച്ചിരുന്നു. കേരളത്തിൽ ആദ്യം റിപ്പോർ‍ട്ട് ചെയ്ത കോവിഡ് കേസുകളിൽ ഒന്ന് പനത്തടി പഞ്ചായത്തിലെ ജനങ്ങൾ ഏറ്റവും കൂടുതല്‍ ആശ്രയിക്കുന്നതും യാത്ര ചെയ്യുന്ന പട്ടണവുമായ കാഞ്ഞങ്ങാട് നഗരസഭാ പരിധിയിൽ ആയതിനാലും മറ്റൊരു സംസ്ഥാനവുമായി അതിർ‍ത്തി പങ്കിടുന്നതിനാലും പനത്തടി ഗ്രാമപഞ്ചായത്തിൽ പ്രത്യേക ശ്രദ്ധ പുലർ‍ത്തേണ്ടത് അനിവാര്യമായിരുന്നു. കൂടാതെ അതിർ‍ത്തി പ്രദേശത്തോട് ചേർന്ന് (ഗ്രാമപഞ്ചായത്ത് ഓഫീസിൽ‍നിന്നും കേവലം 200 മീറ്റർ അകലെ) കുടക് ജില്ലയിലെ അതിർ‍ത്തി പ്രദേശങ്ങളിലെ മദ്യവിപണന കടകളിലും ബാറുകളിലും ജില്ലയുടെ വിവിധ ഭാഗങ്ങളിൽ നിന്നും ആളുകൾ കൂട്ടത്തോടെ എത്തിചേരുന്നത് വലിയ ഭീഷണി ഉയർ‍ത്തിയിരുന്നു.
ബഹു. കേരള സർ‍ക്കാറിൻ്റെ ബ്രേക്ക് ദി ചെയിൻ പരിപാടി ഉൾപ്പെടെ കോവിഡ് പ്രതിരോധ പ്രവർ‍ത്തനവുമായി ബന്ധപ്പെട്ട് എല്ലാ ഉത്തരവുകളും നടപ്പാക്കുന്നതിനും നിർ‍ദ്ദേശങ്ങള്‍ ജനങ്ങളിൽ എത്തിക്കുന്നതിനും വ്യാപകമായ ബോധവത്കരണ ക്ലാസ്സുകളും, നോട്ടീസ് വിതരണവും വാഹനഅനൗൺസ്മെൻ്റുകളും നടത്തി. അതിർ‍ത്തിയിൽ പഞ്ചായത്ത് – ആരോഗ്യ – പോലീസ് വകുപ്പുകളെ ഏകോപിപ്പിച്ച് സംയുക്ത നിരീക്ഷണ പരിശോധനാ സംവിധാനം ഒരുക്കി. ബ്രേക്ക് ദി ചെയിൻ പരിപാടിയുടെ ഭാഗമായി വിവിധ വ്യക്തികളും സംഘടനകളുമായി ചേർന്ന് യാത്രക്കാരായ ജനങ്ങൾക്ക് കൈ കഴുകുന്നതിന് സംവിധാനം ഒരുക്കുന്നതിന് ഭരണസമിതി നേതൃത്വം നല്‍കി.
രാജ്യവ്യാപകമായി ലോക്ക് ഡൌൺ പ്രഖ്യാപിക്കുന്നതിനുമുമ്പേ മാർച്ച് 20ാം തിയ്യതി കാസറഗോഡ് ജില്ലയിൽ ഒരാഴ്ച സര്‍ക്കാർ ഓഫീസ് ഉൾപ്പെടെ അവധി പ്രഖ്യാപിച്ചിരുന്നു. ഗ്രാമപഞ്ചായത്ത് ഓഫീസുകൾ ഉൾപ്പെടെ അവശ്യ സർവ്വീസുകൾ പ്രവൃത്തിക്കണം എന്ന നിർദ്ദേശം ഉണ്ടായിരുന്നെങ്കിലും ജീവനക്കാർ വിദൂര സ്ഥലങ്ങളിൽ നിന്നും വരുന്നതിനാൽ ഓഫീസിൽ ജീവനക്കാർ‍ക്ക് എത്തിചേരുവാൻ സാധിക്കുമോ എന്ന ആശങ്ക ഉണ്ടായിരുന്നു. എന്നാൽ ജീവനക്കാർ ഉത്തരവാദിത്വം ഏറ്റെടുത്ത് സ്വന്തം വാഹനങ്ങളിലും, മറ്റും എല്ലാ ദിവസങ്ങളിലും ഓഫീസിൽ ഹാജരായി അർപ്പിതമായ കർ‍ത്തവ്യം നിർവ്വഹിക്കുന്നുണ്ട് എന്ന് പ്രത്യേകം രേഖപ്പെടുത്തട്ടെ.
ലോക്ക് ഡൗൺ പ്രഖ്യാപനത്തിനുശേഷം ഗ്രാമപഞ്ചായത്തിന് ചുമതലകൾ ഏറെയായിരുന്നു. ഏവർ‍ക്കും നിത്യ ജീവിതത്തനുളള സൗകര്യം ഏർ‍പ്പെടുത്തുന്നതിനു പുറമേ കുടിവെളളം, ഭക്ഷണം, മരുന്ന് തുടങ്ങി ആവശ്യമായ വസ്തുക്കൾ ലഭിക്കുന്നുണ്ടോ എന്ന് ഉറപ്പ് വരുത്തണമായിരുന്നു. കൂടാതെ അതിഥി തൊഴിലാളികളുടെ ക്ഷേമ പ്രവർ‍ത്തനങ്ങളിലും ശ്രദ്ധ പതിപ്പിക്കേണ്ടതുണ്ടായിരുന്നു.
ഗ്രാമപഞ്ചായത്ത് പരിധിയിലെ കോളനികളിൽ പലവട്ടം സന്ദർ‍ശനം നടത്തി ഭക്ഷണം ഉൾപ്പെടെ ലഭിക്കുന്നുണ്ടെന്ന് ഉറപ്പ് വരുത്തി. ഗ്രാമപഞ്ചായത്ത് ഭരണസമിതിയുമായി ചർ‍ച്ച നടത്തി കമ്യൂണിറ്റി കിച്ചൺ ആരംഭിക്കുന്നതിനുളള നടപടികൾ ആരംഭിച്ചു.
ഗ്രാമപഞ്ചായത്തിന് ഓഫീസിനു സമീപമുളള കുടുംബശ്രീ കാൻ്റീൻ കമ്യൂണിറ്റി് കിച്ചൺ ആയി ഏറ്റെടുത്ത് നടത്തുന്നതിന് തീരുമാനിച്ചു. ആദ്യഘട്ടത്തില്‍ 44 കുടുംബങ്ങളെയാണ് ഗുണഭോക്താക്കളായി തിരഞ്ഞെടുത്തത്. അതിഥി തൊഴിലാളികൾ‍ക്ക് ഭക്ഷണകിറ്റുകൾ നൽകുന്നതിനുളള നടപടികളും ആരംഭിച്ചു. കമ്യൂണിറ്റി കിച്ചണിലേക്കുളള ഭക്ഷ്യ വസ്തുക്കൾ വിവിധ സംഘടനകൾ സംഭാവനയായി നൽകി. ഭക്ഷണം നൽ‍കുന്ന 44 കുടുംബങ്ങളിലും ഭവന സന്ദർ‍ശനം നടത്തി. ഭക്ഷണം വിതരണം ചെയ്യുന്നതിന് വാഹന സൗകര്യം ഏർ‍പ്പെടുത്തി. പൊതുഗതാഗതം തടസമായ സാഹചര്യത്തിൽ വളരെ അധികം ജീവനക്കാർ ജോലി ചെയ്യുന്ന പ്രാഥമിക ആരോഗ്യ കേന്ദ്രത്തിൽ, ജീവനക്കാർ‍ക്ക് ദിവസവും ജോലിക്ക് ഹാജരാകുന്നതിന് വേണ്ടി പാണത്തൂർ ഹൈസ്കൂളിന്റെ സ്കൂള്‍ ബസ്സ് ഏർ‍പ്പെടുത്തുകയും ആയതിന്റെ ചിലവ് തുകയ്ക്ക് തനത്ഫണ്ടിൽ നിന്നും തുക വകയിരുത്തി പദ്ധതി തയ്യാറാക്കുകയും ചെയ്യ്തു.
ആരോഗ്യ പ്രവർ‍ത്തകർക്ക് കോളനികൾ സന്ദർ‍ശിക്കുന്നതിനും രോഗ പ്രതിരോധ പ്രവർ‍ത്തനങ്ങൾ നടത്തുന്നതിനും പ്രത്യേകം വാഹനം സജ്ജമാക്കി.
റേഷന്‍കടകള്‍ വഴി ഭക്ഷ്യധാന്യം ലഭിച്ചു തുടങ്ങിയതോടുകൂടി കമ്യൂണിറ്റികിച്ചൺ വഴി വിതരണം ചെയ്യേണ്ട ഗുണഭോക്താക്കളുടെ എണ്ണം കുറഞ്ഞു തുടങ്ങി. 44 ൽ നിന്ന് 30 ആയും 30 ല്‍ നിന്ന് 11 പേരിലേക്കും എണ്ണം ചുരുങ്ങി. അതിഥി തൊഴിലാളികൾ വ്യത്യസ്ത ഭക്ഷണത്തിനായി ആവശ്യപ്പെട്ടുവെങ്കിലും നിലവിൽ അനുവദിച്ച ഭക്ഷണ കിറ്റുകൾ തന്നെ ഉപയോഗിക്കേണ്ടതിൻ്റെ സഹചര്യം അവരെ ബോദ്ധ്യപ്പെടുത്തി.
ഒരു കോവിഡ് കേസ് പോലും പനത്തടി ഗ്രാമപഞ്ചായത്തിൽ റിപ്പോര്‍ട്ട് ചെയ്തിട്ടില്ല എന്നത് വളരേയേറെ ആശ്വാസം നൽ‍കുന്നു. ഭരണ സമിതിയും ആരോഗ്യ പോലിസ് വകുപ്പുകളും പുലർ‍ത്തിയ നിതാന്ത ജാഗ്രത പ്രശംസനീയമാണ്. ബഹു. പഞ്ചായത്ത് ഡി.ഡി.പി ഉൾപ്പെടെ ജില്ലാ അധികാരകേന്ദ്രങ്ങളിൽ നിന്നും ലഭിച്ച പിന്തുണ വളരെ വിലപ്പെട്ടതാണ്. കോവിഡ് ഭീഷണിക്ക് പുറമേ പഞ്ചായത്ത് നേരിടാൻ പോകുന്ന മറ്റൊരു പ്രശ്നം ഡങ്കി പനിയുടെ ഭീഷണിയാണ്. കഴിഞ്ഞ വർ‍ഷം ഏറ്റവും കൂടുതൽ ഡങ്കി പനി റിപ്പോർ‍ട്ട് ചെയ്ത പഞ്ചായത്തുകളിലൊന്ന് പനത്തടി പഞ്ചായത്ത് ആയിരുന്നു. രോഗഭീഷണി നേരിടുന്നതിന് സജീവമായ പ്രവർ‍ത്തനങ്ങൾ നേരത്തെതന്നെ തുടങ്ങിയിട്ടുണ്ട്. വാർഡ് തല ശുചീകരണ പ്രവർ‍ത്തനങ്ങൾ പൂർ‍ത്തിയാക്കി. ബോധവത്കരണ പ്രവർ‍ത്തനങ്ങൾ നടന്നു വരുന്നു.
അപ്രതീക്ഷികതമായി കടന്നുവന്ന മഹാമാരി താത്കാലികമായി ജീവിത രീതികളെ മാറ്റിമറിച്ചുവെങ്കിലും ഒട്ടേറെ ദുരന്തങ്ങളിൽ തളരാതെ മുന്നേറിയ നമ്മൾ ഈ മഹാമാരിക്കെതിരായ പോരാട്ടവും ജയിക്കുമെന്ന് ഉറപ്പാണ്. നമ്മുടെ കൊച്ചുകേരളംലോകത്തിന് മാതൃകയായി മഹാമാരിക്കെതിരെ പോരാടുമ്പോൾ കരുതലോടെ കൂടെ നില്‍ക്കാം നമുക്ക്.
ബാലകൃഷ്ണന്‍ കെ
സെക്രട്ടറി
പനത്തടി ഗ്രാമപഞ്ചായത്ത്
No comments:
Post a Comment